कोल्हार | प्रतिनिधी : राहाता तालुक्यातील कोल्हार येथील बसस्थानकासमोर पैशांचा हारजितीचा जुगार खेळणाऱ्या २३ जणांविरुद्ध लोणी पोलिसांनी कारवाई केली आहे. या कारवाईत रोख रक्कम, विविध कंपन्यांचे मोबाईल आणि जुगारासाठी वापरलेले पत्त्यांचे कॅट असा एकूण ३ लाख ११ हजार १५० रुपयांचा मुद्देमाल जप्त करण्यात आल्याची माहिती पोलिसांच्या दैनिक अहवालातून समोर आली आहे. याप्रकरणी महाराष्ट्र जुगार प्रतिबंधक कायद्यानुसार गुन्हा दाखल करण्यात आला आहे
.
पोलिसांच्या अहवालानुसार, सोमवार, २६ ऑक्टोबर २०२६ रोजी सायंकाळी ४ वाजून २५ मिनिटांच्या सुमारास कोल्हार येथील बसस्थानकासमोर ही कारवाई करण्यात आली. संबंधित ठिकाणी काही व्यक्ती पैशांचा हारजितीचा जुगार खेळत असल्याची माहिती मिळाल्यानंतर पोलिसांनी कारवाई केली. यावेळी २३ जण जुगार खेळताना आढळून आल्याचे पोलिसांनी सांगितले.
या कारवाईत पोलिसांनी संबंधित व्यक्तींकडून रोख रक्कम आणि मोबाईल फोन जप्त केले. जप्त करण्यात आलेल्या मोबाईलमध्ये आयफोनसह विविध कंपन्यांच्या महागड्या मोबाईलचा समावेश आहे. काही मोबाईलची किंमत हजारो रुपयांपासून ते ५० हजार रुपयांपर्यंत असल्याचे अहवालात नमूद आहे. रोख रक्कम आणि मोबाईलच्या किमतीसह एकूण जप्त मुद्देमाल ३ लाख ११ हजार १५० रुपये असल्याचे पोलिसांनी नोंदवले आहे.
या प्रकरणी लोणी पोलीस ठाण्यात महाराष्ट्र जुगार प्रतिबंधक कायद्याच्या कलम ४ व ५ अन्वये गुन्हा रजिस्टर क्रमांक ५३२/२०२६ दाखल करण्यात आला आहे. या गुन्ह्याचा पुढील तपास पोलीस हेड कॉन्स्टेबल गणेश आडागळे करीत आहेत. लोणी पोलीस ठाण्याचे सहाय्यक पोलीस निरीक्षक युवराज आठरे यांच्या मार्गदर्शनाखाली ही कारवाई करण्यात आली.
